Die bestuurder en eienaar van DIY Superstore in Bloemfontein, Marius Eksteen, het gister vlugtig in die Bloemfonteinse landdroshof verskyn op aanklagte van crimen injuria en aanranding.
Luidens ‘n klagstaat beweer die staat die 52-jarige Eksteen het op 19 Februarie by sy winkel in Monumentweg in die stad vir M.J. Juwa die k-woord hond genoem.
Die staat voer verder aan dat Eksteen hom aangerand het deur hom te probeer wurg.
Die verhoor is op versoek van die staat uitgestel hangende ’n beslissing van die direkteur van openbare vervolging.
Die aanklagte volg uit ’n beweerde onderonsie tussen die twee, waartydens Eksteen nie gelukkig was met Juwa se reaksie op ‘n versoek van sy werkgewer nie.
Eksteen is op waarskuwing vrygelaat.
Die saak sal op 11 April hervat word.